Gen 3 | MEU | STEP | Gaigai ena aonega ese Dirava Iehova e kara boromadia iboudiai edia aonega e hereadia. Ia ese hahine e nanadaia, eto, Momokani Dirava eto umui na imea audia ta huahuana basio ani a?

Genesis 3

Gwau-edeede

1 Gaigai ena aonega ese Dirava Iehova e kara boromadia iboudiai edia aonega e hereadia. Ia ese hahine e nanadaia, eto, Momokani Dirava eto umui na imea audia ta huahuana basio ani a? 2 Bena hahine ese gaigai e haere henia, eto, Imea audia huahuadia baia ani; 3 to Dirava eto “Imea bogaraginai e ginimu auna huahuana basio ania bona basio daua toho, ba mase na garina”. 4 Gaigai ese hahine e hamaoroa, eto, Momokani, umui na basio mase: 5 Dirava vada dibana raruosi bavania dinana ai na matamui bae papa, bena Dirava ida ba heḡereḡere, namo bona dika ba diba.

6 Hahine ese e itaia, una au huahuana be aniani ḡauna namona, ita-itana danu namo, bona lalo-parara ihavarana ḡauna; bena ia ese e abia, adavana danu e henia, ia danu e ania. 7 Bena raruosi matadia e papa, vada e diba idia na ḡaḡaedia mo nonoho; bena idia ese suke raudia e turi hebou, edia riorio ḡaudia e kara. 8 Bena raruosi ese Dirava Iehova gadona e kamonai, ia na dina kerumana ai imea lalonai e loava; bena Adam mai adavana ida Dirava Iehova vairana amo e komu, imea audia muridiai. 9 Bena Dirava Iehova ese Adam e boi henia, eto, Oi na edeseni ai? 10 Ia na e haere, eto, Gadomu imea lalonai na kamonai, bena vada na gari, badina be ḡaḡaegu mo na noho, taunabunai na komu. 11 Dirava Iehova eto, Daika ese e hamaorumu oi na ḡaḡaemu mo noho? Lau na haduamu basio ania nato huahuana vada o ania a? 12 Adam e haere, eto, Vada o henigu baine bamogu hahinena ese una au huahuana e henigu, bena na ania. 13 Bena Dirava Iehova ese hahine e gwau henia, eto, Ina na dahaka vada o karaia? Hahine na eto, Gaigai ese e koigu, bena na ania.

14 Bena Dirava Iehova ese gaigai e gwau henia, eto, Unu vada o kara toma dainai, emu dika davana be boromakau iboudiai bona uda boromadia iboudiai edia dika davadia baine hereadia: kopamu ai do ba rau, tano ḡahuna bavania, emu mauri dinadia iboudiai. 15 Lau ese oi bona hahine baina haheinai hehenimui, oi garamu bona ia garana danu baina haheinai hehenidia. Ia ese oi kwaramu baine huaria, bona oi ese ia aena geduna ba tutua. 16 Hahine danu e gwau henia, eto, Emu rogorogo hisina lau ese baina habadaia; hisihisi ai ba mara, to adavamu ba ura henia, ia ese biagumu ai bainela. 17 Adam danu e gwau henia, eto, Adavamu erena o kamonai, bena na haduamu basio ania nato huahuana vada o ania, una dainai tano vada baine dika oi bagumu ai. Tano anina bavania mai hekwarahimu ida emu mauri dinadia iboudiai. 18 Au giniginidia bona ava ḡiniḡinidia danu tano ai bae vara oiemu ai. Tanobada avadia anidia do bavani. 19 Vairamu varahuna ai bavaniani ela bona tano ba lou henia, badina be tano amo oma. Oi na tano ḡahuna: tano ḡahuna danu do ba lou henia.

20 Bena Adam ese adavana ladana e hatoa Heva ^{▼▼“Heva” anina be “mauri”.} badina be ia na mauri taudia iboudiai sinadia. 21 Bena Dirava Iehova ese boromakau kopidia amo hahedoki dabuadia e kara, Adam ena bona adavana Heva ena, raruosi e hadabualaidia.

22 Bana Dirava Iehova eto, Taunimanima a itaia, ia na lau heḡereḡeregu ai vada ela, namo bona dika baine diba; readia ia ese imana ma baine toia roro, mauri auna huahuana baine abia, baine ania, bena baine mauri hanai-hanai. 23 Taunabunai Dirava Iehova ese Moale imeana lalona amo e lulua lasi, tano amo e vara tanona baine biru henia. 24 Ia ese Adam e lulua lasi; bena Moale imeana mairiveina kahana ai kerubi e haginidia, bona lahi darena e atoa, una dare matana e hegiro hanaihanaiva, mauri auna ilao-henina dalana e laoa ahu.